![Հայաստանի հանրային ռադիոյի անդրադարձը «Երիտասարդական գրականագիտական մրցույթին»](https://hkdepo.am/media/cache/news1/i/news/susanna-harutyunyan-speaks-about-kayaran-s-function-to-develop-theoretical-literary-skills_sus.jpg)
Հայաստանի հանրային ռադիոյի անդրադարձը «Երիտասարդական գրականագիտական մրցույթին»
Այս հարցազրույցն առաջին անգամ հրապարակվել է Հայաստանի հանրային ռադիոյի կայքէջում։ Հասանելի է այստեղ։
«Գրական կայարան» կազմակերպությունը արդեն 3 –րդ տարին է իրականացնում է «Երիտասարդական գրականագիտական մրցույթ», որի նպատակն է գրականությամբ հետաքրքրվող երիտասարդների շրջանում զարգացնել քննադատական ու վերլուծական միտքը, ժամանակակից հայ գրողների ստեղծագործությունների մասին գրախոսություններ գրելու հմտությունները։
«Մեր ամբողջ գործունեությունն ուղղված է հայ ժամանակակից գրականության զարգացմանը։ Մեզ համար կարևոր է, որ մասնակիցները ընթերցեն ժամանակակից գրողներին, նույնիսկ կարևոր էլ չէր` գրախոսականներ կգրե՞ն, թե՞ ոչ։ Երիտասարդները ընթերցելով պիտի կարողանան լավը վատից տարբերել և հասկանան՝ ինչ ասել է գրական գործ», – ասում է մրցույթի կազմակերպիչ, «Գրական կայարան» ՀԿ–ի տնօրեն, արձակագիր Սուսաննա Հարությունյանը։
Ծրագրի շրջանակում հանրապետության չորս մարզերում և Երևանում իրականացվել են դասընթացներ, որից հետո դիմորդներն իրենց նախընտրած ստեղծագործության վերաբերյալ գրել են գրախոսություններ:
Սուսաննա Հարությունյանն ասում է, որ սա պրոֆեսիոնալ գրականագետների մրցույթ չէ։ Կարևորը երիտասարդների հետ աշխատանքն է, որպեսզի նրանք տարբեր հարթակներում նպաստեն ժամանակակից հայ գրականության ներկայացմանն ու տարածմանը։