Դրամաշնորհային հայտ

 

Դրամաշնորհային հայտերի վերաբերյալ հայտադիմում

ՀԱՅԱՍՏԱՆՈՒՄ ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԿԱԶՄԱԿԵՐՊՈՒԹՅՈՒՆՆԵՐԻ ՀԱՄԱՐ
Ծրագիր: Ուժեղացնելով Արևելյան հարևանության տոկունությունը 2 (BREN II)
Դրամաշնորհի տեսակը: Բաց մրցույթ

Ո՞վ կարող է դիմել	Հայաստանի Հանրապետությունում գրանցված քաղաքացիական հասարակության ցանկացած, այդ թվում մեդիա կազմակերպություն
Դիմելու վերջնաժամկետը	Երկուշաբթի, հունիսի 22, 2026թ., Երևանի ժամանակով 23:59
Դրամաշնորհի չափը	40,000-80,000 բրիտանական ֆունտ
Ֆինանսավորման տեսակը	Ծրագրային դրամաշնորհներ
Ծրագրի տևողությունը	Առավելագույնը 11 ամիս (կարճատև ծրագրերը նույնպես ընդունելի են) Ակնկալվում է, որ ծրագրերը կմեկնարկեն հուլիսի երկրորդ կեսին։ Բոլոր ծրագրերը պետք է ավարտված լինեն մինչև 2027 թ-ի մայիսի 14-ը։
Հատկացվելիք դրամաշնորհների նախատեսված քանակը	Առավելագույնը 5-7 դրամաշնորհ

 

1. Նախապատմությունը և նպատակը

Սույն ծրագրային փուլի համար BREN II-ը կորդեգրի վերանայված թեմատիկ ուղղվածություն, որը համապատասխանում է Մեծ Բրիտանիայի ռազմավարական առաջնահերթություններին։ Վերջիններս վերաբերում են տարածաշրջանային կայունությանը, տոկունությանը և անվտանգային նոր մարտահրավերներին: Ավելի մեծ շեշտադրում կկատարվի մարդկային անվտանգության ամրապնդման վրա, ինչպես նաև բարդ և զգայուն միջավայրերում գործող դերակատարներին աջակցություն ցույց տալու վրա։ Ծրագրի նպատակն է ապահովել այնպիսի   միջամտություններ, որոնք ունեն ճիշտ թիրախավորում և համապատասխանում են տարածաշրջանային համատեքստին:

Մեծ Բրիտանիայի կողմից ֆինանսավորվող BREN II ծրագիրը աջակցում է քաղաքացիական հասարակության այնպիսի նախաձեռնություններ, որոնք միտված են Արևելյան հարևանության երկրներում մարդկային անվտանգության ամրապնդմանը, հատկապես կանանց և խոցելիություն ունեցող այլ խմբերի համար։

2026–2027 թթ. իրականացվող յուրաքանչյուր ծրագիր պետք է անդրադառնա ստորև ներկայացված թեմատիկ առաջնահերթություններից առնվազն մեկին և ունենա տոկունության, տեղեկատվական ամբողջականության և հանրային վստահության ամրապնդման մոտեցում։

2. Թեմատիկ առջնահերթությունները Հայաստանի համար

Կանայք, խաղաղություն և անվտանգություն օրակարգ (ԿԽԱ)։ Աջակցություն այնպիսի նախաձեռնությունների, որոնք նպաստում են Հայաստանում ներառական խաղաղաշինության, մարդկային անվտանգության և ինստիտուցիոնալ տոկունության ամրապնդմանը։ Ներառում է այնպիսի գործողություններ, որոնք վերաբերում են ՄԱԿ-ի Անվտանգության խորհրդի 1325 բանաձևի շուրջ Հայաստանի  Գործողությունների ազգային երրորդ ծրագրի նպատակների իրականացմանն ու տեղայնացմանը։ Թեմատիկ այս ուղղությունը կարող է նաև ներառել համագործակցություններ։ Հատկապես կարևորվում են Երևանից դուրս գտնվող սահմանամերձ և խոցելի շրջաններում գործող տեղական իշխանությունների հետ այնպիսի համագործակցությունները, որոնք նպատակ ունեն ամրապնդել ներառական անվտանգության կառավարումը և համայնքային մակարդակներում խաղաղաշինական գործընթացների խթանումը։ Պետք է հատուկ ուշադրություն դարձնել խաղաղության, անվտանգության և որոշումների կայացման գործընթացներում կանանց բովանդակալից և արդյունավետ մասնակցության խթանման վրա։

Մարդկային անվտանգություն, ինստիտուցիոնալ տոկունություն։ Ծրագրերը պետք է կենտրոնանան մարդկային անվտանգության ամրապնդման վրա՝ զարգացնելով ինստիտուտների և համայնքների կարողությունները, որոնք էլ իրենց հերթին հնարավորություն կընձեռեն արագ արձագանքել առկա և նոր ռիսկերին և ճնշումներին։ Սա նաև ներառում է ինստիտուցիոնալ թափանցիկության և հաշվետվողականության խթանումը՝ միաժամանակ նպաստելով քաղաքացիների, քաղաքացիական հասարակության, հանրային նշանակության տեղեկատվական կառույցների և պետական դերակատարների միջև երկխոսությանն ու համագործակցությանը։ Գործողությունները պետք է միտված լինեն համայնքների հետ փոխգործակցության բարելավմանը, բաց և ապացուցահեն որոշումների կայացման խթանմանը, ինչպես նաև մարտահրավերներին արդյունավետ արձագանքելու կարողությունների զարգացմանը։ Թեմատիկ այս ուղղության շրջանակներում հնարավոր է իրականացնել այնպիսի նախաձեռնություններ, որոնք նպաստում են վստահելի և արժանահավատ հանրային տեղեկատվության հասանելիությանը, քաղաքացիական ներգրավվածությանը, ինչպես նաև քաղաքացիական հասարակության կազմակերպությունների, հանրային նշանակության տեղեկատվական կառույցների, համայնքային դերակատարների և պետական հաստատությունների միջև համակարգման, գիտելիքի փոխանակման և համագործակցության զարգացմանը։

Սոցիալական համախմբվածություն, հանրային վստահություն և ներառականություն։ Ծրագրերը պետք է կենտրոնանան սոցիալական համախմբվածության խթանման, ինչպես նաև համայնքներում քաղաքացիների ու պետական հաստատությունների միջև վստահության ամրապնդման վրա։ Թեմատիկ այս ուղղության շրջանակներում պետք է նպաստել ներառական մասնակցության, երկխոսության և համայնքային ներգրավվածության խթանմանը՝ հատուկ ուշադրություն դարձնելով երիտասարդների և թերներկայացված խմբերի վրա։ Գործողությունները պետք է միտված լինեն բևեռացումների հաղթահարմանը, հասարակության մասնատվածության նվազեցմանը և տեղական մակարդակում նախաձեռնվող ու իրականացվող այնպիսի ծրագրերի աջակցմանը, որոնք նպաստում են փոխըմբռնման ամրապնդմանը և կառուցողական հանրային քննարկումների զարգացմանը, այդ թվում՝ քաղաքացիական հասարակության կազմակերպությունների, համայնքային դերակատարների և հանրային նշանակության տեղեկատվական հարթակների միջև համագործակցության միջոցով։

Թեմատիկ բոլոր ուղղությունների շրջանակներում հայտադիմումները պետք է հստակ ցույց տան, թե ինչպես են գենդերային հավասարության, ներառականության և կոնֆլիկտազգայունության մոտեցումները ներառվելու ծրագրի իրականացման բոլոր փուլերում։ Հատուկ ուշադրություն պետք է դարձնել կանանց, երիտասարդների, ինչպես նաև թերներկայացված կամ խոցելի խմբերի բովանդակալից մասնակցության ապահովման վրա, այդ թվում՝ տեղական որոշումների կայացման, համայնքային ներգրավվածության և դիմակայունության ամրապնդման գործընթացներում։

Հնարավոր գործողությունները     

l   Նյութերի ստեղծում. հետազոտական, կրթական, կամ մեդիա։

l   Շահերի պաշտպանություն. համագործակցություն կառավարության, տեղական իշխանությունների կամ համայնքային հաստատությունների հետ։

l   Կարողությունների զարգացում և իրազեկում. արշավներ, միջոցառումներ և նախաձեռնություններ, որոնք ուղղված են կարևոր հարցերի շուրջ հանրային ընկալումների և ներգրավվածության խթանմանը։

l   Համայնքային աշխատանք. կանանց, փոքրամասնությունների, տեղահանված անձանց, փախստականների, երիտասարդների և այլ խմբերի կարողությունների և գիտելիքների զարգացում, իմաստալից մասնակցության խթանում։

l   Կարողությունների զարգացում. կազմակերպության զարգացմանը միտված գործողություններ, ներառյալ քաղաքացիական հասարակության կազմակերպությունների, անկախ մեդիայի և շահագրգիռ այլ կողմերի համար վերապատրաստումների իրականացում, մենթորություն և տեխնիկական աջակցություն։

Մեծապես խրախուսվում է դիմել․

l   Երևանից դուրս, հատկապես սահմանամերձ մարզերում գործող կազմակերպություններին

l   Նորաստեղծ կազմակերպություններին

Համատեղ հայտեր

Գործընկերությունները ողջունելի են, մասնավորապես եթե․

l   Միավորում են մայրաքաղաքում և մարզերում գտնվող ՔՀԿ-ներին

l   Միավորում են փորձառության տարբեր ոլորտներ

l   Միավորում են ՔՀԿ-ները մեդիա կազմակերպությունների հետ

3. Ի՞նչ է պահանջվում

Դիմորդները պետք է ցույց տան.

l   Հարգանք ժողովրդավարական արժեքների և մարդու իրավունքների նկատմամբ։

l   Տեղեկատվական ամբողջականության և էթիկական չափանիշների պահպանում։

l   Ռիսկերը բացահայտելու, վերլուծելու և մեղմելու ունակություն։

l   Ծրագրի և ֆինանսների կառավարման թափանցիկություն։

l   Այլ դրամաշնորհառուների հետ սովորելու և կիսվելու պատրաստակամություն։

l   Անկողմնակալություն և ծրագրում կուսակցական կամ քաղաքական ուղղվածության բացառում։

l   Կայունության հստակ ծրագիր (դրամաշնորհի ավարտից հետո իրականացված ծրագրի ազդեցության շարունակականության համար)։

 

4. Հայտադիմումի փաթեթը

Անհրաժեշտ է էլեկտրոնային նամակով ուղարկել (էլ․ նամակի Subject մասում նշել: BREN II-ABPG-2026-ARM-[Org Acronym]) հետևյալ հասցեին [email protected]

1. Լրացված հայտադիմումը (առավելագույնը 10 էջ),
2. Բյուջեն՝ մանրամասներով (Excel),
3. Հավելվածները․
   • կազմակերպության գրանցման վկայական,
   • ֆինանսական վերջին հաշվետվություն (աուդիտի ենթարկված կամ չենթարկված),
   • կազմակերպության կառուցվածք (Chart)/ անձնակազմի ցանկ,
   • պաշտպանության/safeguarding քաղաքականությունը կամ ստորագրված հանձնառությունը։

5. Գնահատում և ընտրություն

Հայտադիմումների գնահատումն իրականացվելու է երկու փուլով։ Առաջին փուլում հայտադիմումները կդիտարկվեն Պատերազմի և խաղաղության լուսաբանման ինստիտուտի (ՊԽԼԻ) կողմից, կառանձնացվեն միավորների հետևյալ շեմը հաղթահարած հայտադիմումները․

Գնահատում	Միավոր
Հայտադիմումը հստակ է և մանրամասն, բոլոր անհրաժեշտ փաստաթղթերն առկա են, իսկ առաջարկվող ծրագիրն ակնհայտորեն համահունչ է BREN II ծրագրի թեմատիկ առաջնահերթություններին։	8-10 միավոր
Հայտադիմումը հիմնականում պարզ է և պարունակում է բավարար տեղեկատվություն, հիմնական փաստաթղթերի մեծ մասն առկա է, իսկ առաջարկվող ծրագիրը հիմնականում համահունչ է BREN II ծրագրի թեմատիկ առաջնահերթություններին։	5-7 միավոր
Հայտադիմումն անհասկանալի է կամ բացակայում են փաստաթղթեր, կամ թեմատիկ ուղղությունը չի համապատասխանում BREN II ծրագրի թեմատիկ առաջնահերթություններին:	1-4 միավոր

ՊԽԼԻ-ն կարող է պարզաբանումներ խնդրել կազմակերպություններից առաջին փուլի դիտարկումների ժամանակ: Նվազագույնը 5 միավոր ունցող հայտադիմումները կներկայացվեն ընտրող հանձնաժողովի վերջնական դիտարկմանը։

 

 

Վերջնական ընտրություն

Ընտրող հանձնաժողովը, որը բաղկացած է ՊԽԼԻ-ի և Հայաստանում Միացյալ Թագավորության դեսպանատան ներկայացուցիչներից, կգնահատի հայտադիմումները՝ հիմնվելով ստորև ներկայացված աղյուսակում նկարագրված չափանիշների վրա: Ֆինանսավորման համար կընտրվեն ամենաբարձր միավորներ ստացած հայտադիմումատուները: Վերջնական ֆինանսավորումը կախված կլինի վեթինգի արդյունքներից։

Հ/Հ	Չափանիշ	Առավելագույն միավորներ
1.	Մրցույթի նպատակներին համապատասխան արձագանք Ծրագրի նախագիծը համապատասխանում է սույն մրցույթի նպատակներին և առաջարկում է համապատասխան լուծումներ Հայաստանում առկա մարտահրավերներին: Այն հիմնված է առաջարկվող թեմատիկ ոլորտների վրա և իր ներդրումն է ունենում դրանցում։	30
2.	Տեխնիկական մոտեցում Առաջարկվող ծրագրի նախագիծը ներկայացնում է իրավիճակի հստակ վերլուծություն, հատկորոշում է ծրագրի հստակ նպատակները, վերջնարդյունքները և գործողությունները, որոնք համապատասխան են միմյանց: Ծրագիրը կարող է իրականացվել չափավոր ռիսկերով:	30
3.	Կազմակերպության դիմակայունություն Ծրագիրը ցույց է տալիս, որ ծրագրի իրականացումը բխում է կազմակերպության շահերից և կօգնի կազմակերպությանը դառնալ ավելի տոկուն։	20
4.	Ծախսերի գնահատում Ծրագրի բյուջեն հստակ է և համապատասխանում է տեխնիկական մոտեցմանը։ Ներառված ծախսերը խելամիտ են և անհրաժեշտ են ծրագրի նպատակներին հասնելու համար։	20
Տեխնիկական առավելագույն ընդհանուր միավոր:		100

 

6. Դիմելու գործընթացը և ժամանակացույցը

Հետաքրքրված կազմակերպությունները կարող են լրացված հայտադիմումը, բյուջեի ձևաթուղթը, ինչպես նաև հավելվածներն ուղարկել հետևյալ էլեկտրոնային հասցեին։ [email protected]

Հայտադիմումները կարող են ներկայացվել հայերենով կամ անգլերենով (նախընտրելի լեզուն անգլերենն է, այնուամենայնիվ, հայտադիմումի լեզուն չի ազդի դրամաշնորհի հատկացման վերաբերյալ որոշման վրա):

Մենք խրախուսում ենք, որ ծրագրային և ֆինանսական նկարագրերը գրվեն  կազմակերպության աշխատակիցների կողմից:  Արհեստական բանականության (AI) օգտագործումը հասցնել նվազագույնի և օգտագործվի պատասխանատվությամբ և էթիկայի նորմերի շրջանակներում:

Ունե՞ք հարցեր։ Կապ հաստատեք Հայաստանում BREN II ծրագրի համակարգող Քնարիկ Մկրտչյանի հետ [email protected] էլ․ հասցեով մինչև սույն թվականի հունիսի 19-ը ներառյալ։

Դրամաշնորհի մասին տեղեկատվական առցանց հանդիպումները տեղի կունենան սույն թվականի հունիսի 16-ին և 19-ին։ Հանդիպումներից որևիցե մեկին գրանցվելու և մասնակցելու համար խնդրում ենք անցնել հետևյալ Զում հղումներով.

Հունիսի 16, 2026 թ.

Հունիսի 19, 2026 թ.

7. ՊԽԼԻ-ի և BREN II-ի մասին

Պատերազմի և խաղաղության լուսաբանման ինստիտուտը (ՊԽԼԻ) (iwpr.net) միջազգային ոչ առևտրային կազմակերպություն է, որը կառուցում է խաղաղություն և ժողովրդավարություն ազատ լրատվամիջոցների և տոկուն քաղաքացիական հասարակության միջոցով։

«Ուժեղացնելով Արևելյան հարևանության տոկունությունը 2»  (BREN II) ծրագիրն իրականացվում է «Պատերազմի և խաղաղության լուսաբանման ինստիտուտ»-ի կողմից և ֆինանսավորվում է Մեծ Բրիտանիայի Արտաքին գործերի, համագործակցության և զարգացման նախարարության (FCDO) կողմից։

Սիրով սպասում ենք Ձեր նորարարական առաջարկներին, որոնք կնպաստեն Հայաստանում տոկունությանը, տեղեկատվական ամբողջականությանը և հանրային վստահությանը։

 

• ENG Grant Application Form
• ARM Grant Application Form
• Arm_ENG_Budget_Form