Հանրային լրագրության ակումբը (այսուհետ՝ ՀԼԱ) հրավիրում է հետազոտական կազմակերպություններին, անհատ հետազոտողներին դիմելու «Հայաստան-Թուրքիա կարգավորման գործընթացի ապատեղեկատվական հոսքերն ու կեղծ պատմույթները» թեմայով հետազոտություն իրականացնելու մրցույթին։

Հետազոտության նպատակն է ուսումնասիրել Հայաստան-Թուրքիա կարգավորման գործընթացի համատեքստում շրջանառվող ապատեղեկատվական հոսքերը, կեղծ պատմույթները, դավադրապաշտական տեսությունները, որոնք խեղաթյուրում են իրական գործընթացները և խոչընդոտում են ժողովուրդների ու պետությունների միջև հարաբերությունների կառուցմանը։ Հետազոտությունը, վեր հանելով առկա խնդիրները, պետք է գտնի դրանց օրինաչափությունները, ընդհանրությունները, տարբերությունները և առանձնահատկությունները, առաջարկի ռազմավարական հաղորդակցության այնպիսի մոտեցումներ, որոնք կօգնեն հաղթահարել վեր հանված խնդիրներն առնվազն քաղաքացիական հասարակությունների մակարդակում։

Հետազոտության խնդիրներ են՝

• Մշակել հետազոտական մեթոդաբանություն, որի հիմքում կլինի ավանդական և ժամանակակից մեդիայում, կառավարությունների կողմից շրջանառվող տեղեկությունների և պատմույթների ուսումնասիրությունը և վերլուծությունը։

• Հետազոտության շրջանակում իրականացվող ուսումնասիրությունները պետք է կենտրոնանան մի քանի կարևոր ժամանակահատվածների՝ 2020 թվականի հունվար-սեպտեմբեր ժամանակահատվածը և դրան հաջորդող 6-12 ամիսները (ԼՂ երկրորդ պատերազմ. առաջ և հետո), 2023 թվականի առաջին եռամսյակը (երկարաշարժը Թուրքիայում)։

• Հետազոտության շրջանակում մշակել ուսումնասիրության մեթոդաբանական, աղբյուրների ընտրության, դրանց վերլուծության չափանիշներն ու մոտեցումները։

• Հետազոտության սեղանային աշխատանքի փուլում ձեռք բերված տեղեկությունների հիման վրա կատարել ֆոկուս-խմբային քննարկումներ Հայաստանի մարզերում՝ հասկանալու վեր հանված կեղծ պատմույթների, ապատեղեկատվության, դավադրապաշտական տեսությունների տարածվածությունը, դրանց ազդեցությունը համայնքային կյանքի և անհատների մակարդակում։

• Մշակել հետազոտության զեկույցը՝ ներառելով բոլոր բաղադրիչները, մասնավորապես․

  • Զեկույցի տիտղոսաթերթը,

  • Հետազոտության ամփոփագիրը (abstract)

  • Հետազոտության նախաբանը,

  • Հետազոտության նպատակները և խնդիրները,

  • Հետազոտության մեթոդաբանությունը,

  • Հետազոտության շրջանակում ուսումնասիրված աղբյուրները,

  • Հետազոտության արդյունքները երկու մասով՝ սեղանային և դաշտային աշխատանքների արդյունքները, դրանց վերլուծությունը,

  • Եզրակացությունները՝ իրականացված վերլուծությունների օրինաչափությունների և առանձնահատկությունների հիման վրա,

  • Ռազմավարական հաղորդակցությունը բարելավելու առաջարկները,

  • Հղումները,

  • Հավելվածները։

Հետազոտության իրականացման համար ՀԼԱ-ն նախատեսում է վեց ամիս ժամանակահատված։ Հետազոտության ավարտին ներկայացվող զեկույցն ուսումնասիրվելու է ՀԼԱ և գործընկեր կառույցների կողմից։ Նախատեսվում են զեկույցի առցանց ներկայացում և քննարկումներ, որոնք կնպաստեն քաղաքացիական հասարակության հարաբերությունների ռազմավարական հաղորդակցության բարելավմանը։

ՀԼԱ-ն խրախուսում է հետազոտական խմբերի և կազմակերպությունների թիմերում ներգրավված լինեն ոչ միայն հետազոտողների, այլև մեդիա դաշտին տիրապետող ինչպես նաև  հաղորդակցության և ռազմավարական հաղորդակցության մասնագետների ներգրավվածությունը։

Դիմելու համար հետաքրքրված խմբերը պետք է ներկայացնեն՝

• Առաջարկվող հետազոտության հայեցակարգը (մինչև 3 էջ, А4 ձևաչափով՝ 11 տառաչափով, Sylfaen տառատեսակով),

• Հետազոտությունների իրականացման փորձառությունը նկարագրող/ցուցադրող հղումներ (պորտֆոլիո),

• Հետազոտական խմբում ներգրավված անձանց ինքնակենսագրականները,

• Հետազոտության իրականացման գնառաջարկը։

Հայտերը գնահատվելու են ըստ վերոգրյալ նկարագրությունների համապատասխանության՝ ծրագիրն իրականացնող Կոնսորցիումի կողմից։

Հայտերի ներկայացման վերջնաժամկետը մայիսի 15-ն է։ 

Հայտերն անհրաժեշտ է ուղարկել ՀԼԱ ծրագրերի ղեկավար Ալեքսանդր Մարտիրոսյանին՝ a[email protected] էլեկտրոնային փոստով՝նամակի թեմա դաշտում նշելով․«Research_#ATNPRR2023_YOUR_NAME»։ Հայտերը, որոնք չեն պարունակի վերոգրյալ փաստաթղթերը կամ կլինեն թերի, չեն դիտարկվելու գնահատման գործընթացում։

————————————

Այս հետազոտությունն իրականացվում է Եվրոպական միության աջակցությամբ։