Դրամաշնորհային հնարավորություն Պատերազմի և խաղաղության լուսաբանման ինստիտուտի (ՊԽԼԻ) կողմից․ Ուժեղացնելով արևելյան հարևանության կայունությունը (BREN)

 

Ծրագրի անվանում՝ Ուժեղացնելով արևելյան հարևանության կայունությունը (BREN)

 

Կարող են դիմել՝ Հայաստանի քաղաքացիական հասարակության և կանանց իրավունքների պաշտպանությամբ զբաղվող կազմակերպությունները։

 

Վերջնաժամկետը՝ օգոստոսի 14, 2022 թ․։

 

Դրամաշնորհի չափը՝ Կարող է շնորհվել մինչև 5 փոքր դրամաշնորհ՝ նվազագույնը 20.000 ֆունտ ստերլինգ (GBP), իսկ առավելագույնը՝ 50.000 ֆունտ ստերլինգ (GBP) չափով: Կարող է շնորհվել մինչև 2 խոշոր դրամաշնորհ առավելագույնը՝ 75․000 ֆունտ ստերլինգի (GBP) չափով:

 

Հատկացվելիք դրամաշնորհների նախատեսված քանակը՝ 4-6։

 

Ծրագրի տևողության ժամկետը՝ մինչև 5 ամիս։

 

 

Մրցույթի մասին

 

Պատերազմի և խաղաղության լուսաբանման ինստիտուտը (ՊԽԼԻ) ընդունում է հայտադիմումներ Հայաստանի քաղաքացիական հասարակության և կանանց իրավունքների պաշտպանությամբ զբաղվող կազմակերպություններից՝ որպես Ուժեղացնելով արևելյան հարևանության կայունությունը (Building Resilience in the Eastern Neighbourhood (BREN)) ծրագրի մաս:

 

Այս մրցույթի նպատակն է Հայաստանում մեծացնել քաղաքացիական հասարակության կազմակերպությունների (ՔՀԿ) և կանանց իրավունքների պաշտպանությամբ զբաղվող կազմակերպությունների մասնակցությունը «Կանայք, խաղաղություն և անվտանգություն» (ԿԽԱ) օրակարգում։

 

Այս մրցույթն ավելի լայն ծրագրի` BREN-ի մի մասն է, և հայտադիմում ներկայացնողներից պահանջվում է մասնակցել ծրագրի ազգային և տարածաշրջանային փորձի փոխանակման և կարողությունների զարգացման աշխատանքներին:

 

Բացի այդ, հայտադիմում ներկայացնողները պարտադիր պետք է լրացնեն կարողությունների գնահատման հարցաթերթիկը։ Խնդրում ենք հաշվի առնել, որ հարցաթերթիկը կարող է քաղաքացիական հասարակության կազմակերպություններին (ՔՀԿ) և կանանց իրավունքների պաշտպանությամբ զբաղվող կազմակերպություններին հատկացվելիք հետագա ֆինանսական միջոցների հիմք հանդիսանալ՝ իրենց կազմակերպությունները հզորացնելու նպատակով:

 

 

Պահանջներ

 

            Հայտադիմում կարող են ներկայացնել Հայաստանում գրանցված քաղաքացիական հասարակության կազմակերպությունները (ՔՀԿ) և կանանց իրավունքների պաշտպանությամբ զբաղվող կազմակերպությունները։ Հայտադիմում ներկայացնողները պետք է հիմնվեն Հայաստանում` «Կանայք, խաղաղություն և անվտանգություն» օրակարգի խնդիրների շուրջ առկա գործողությունների և ջանքերի վրա և փորձեն վեր հանել ու լրացնել այդ գործողություններում և ջանքերում առկա բացերը:

 

Պատերազմի և խաղաղության լուսաբանման ինստիտուտը (ՊԽԼԻ) կարող է ֆինանսավորել այն գործունեությունը, որն ուղղված է.

 

• Նյութերի ստեղծմանը. սա կարող է ներառել ծրագրի խնդիրներից բխող հետազոտական, կրթական, գովազդային կամ մեդիա բովանդակության նյութերի ստեղծում:
• Շահերի պաշտպանությանը․ սա կարող է ներառել այնպիսի գործողություններ, որոնք ենթադրում են շահերի պաշտպանություն և ուղղված են ազգային ու տեղական ինքնակառավարման մարմիններին կամ այնպիսի համայնքային կառույցներին, ինչպիսիք են՝ կրթական և կրոնական հաստատությունները։ Խրախուսվում է շահերի պաշտպանության նպատակով ցանցերի ստեղծումը։
• Համայնքային աշխատանքներին. գործունեություն, որը կենտրոնանում է համայնքներում, հատկապես սահմանամերձ շրջաններում, տեղահանված և թերներկայացված այլ համայնքներում, ինչպես նաև էթնիկ, կրոնական և այլ փոքրամասնությունների շրջանում «Կանայք, խաղաղություն և անվտանգություն» օրակարգի մասին գիտելիքների խորացման վրա: Գործունեությունը պետք է ուղղված լինի այս համայնքների` «Կանայք, խաղաղություն և անվտանգություն» օրակարգի շուրջ քննարկումների, որոշումների կայացման և խթանման գործընթացներում մասնակցության մեծացմանը:

 

Առաջարկվող ծրագրերի առավելագույն տևողությունը պետք է լինի 5 ամիս։ Ծրագրերի համար առաջարկվող բյուջեն կազմում է 20․000 - 50․000 ֆունտ ստերլինգ (GBP) փոքր դրամաշնորհների և մինչև 75․000 ֆունտ ստերլինգ (GBP) խոշոր դրամաշնորհների համար: Մենք մեծապես խրախուսում ենք հետևյալ խմբերին ներկայացնել հայտադիմումներ.

 

• կանանց և/կամ երիտասարդների կողմից ղեկավարվող կազմակերպություններ,
• «Կանայք, խաղաղություն և անվտանգություն» օրակարգի հարցերում հատուկ փորձ ունեցող կազմակերպություններ,
• տեղահանվածների, էթնիկ կամ կրոնական փոքրամասնությունների և այլ թերներկայացված համայնքների կողմից ղեկավարվող կազմակերպություններ,
• Երևանից դուրս, հատկապես սահմանամերձ շրջաններում գործունեություն ծավալող կազմակերպություններ,
• նոր ստեղծված կազմակերպություններ։

 

Գործընկերություններ և ցանցային զարգացում խթանելու նպատակով՝ խրախուսվում է համատեղ հայտադիմումների ներկայացումը հատկապես հետևյալ համակցություններով.

 

• Երևանում և Երևանից դուրս գործող կազմակերպություններ,
• տարբեր ոլորտներում գործունեություն ծավալող կազմակերպություններ,
• լրատվամիջոցների հետ համագործակցող քաղաքացիական հասարակության կազմակերպություններ (ՔՀԿ),
• մեծամասնությունների (էթնիկ, կրոնական և այլ) և փոքրամասնությունների (էթնիկ, կրոնական և այլ) կողմից ղեկավարվող կազմակերպություններ։

 

Հայտադիմում ներկայացնողները պետք է ունենան․

 

• հարգանք գենդերային հավասարության և բազմազանության նկատմամբ,
• կոնֆլիկտազգայունություն և գենդերազգայունություն,
• ռիսկերը վեր հանելու, վերլուծելու և մեղմացնելու ունակություն,
• ծրագրի կառավարման թափանցիկություն և հաշվետվողականություն՝ ներառյալ ֆինասների կառավարման հմտություններ,
• սովորելու և փորձը այլ դրամաշնորհ ստացողների հետ կիսելու պատրաստակամություն,
• դրամաշնորհի շրջանակներում սկսած աշխատանքը շարունակելու կայունության ծրագիր։

 

Ստորև ներկայացված է հավանական ծրագրերի թեմատիկ ոլորտների ոչ սպառիչ ցանկ։

 

• Տեղական և/կամ կենտրոնական իշխանությունների հետ համատեղ իրականացվող շահերի պաշտպանության գործունեություն՝ ուղղված  Հայաստանում «Կանայք, խաղաղություն և անվտանգություն» օրակարգի առաջխաղացմանը։
• ՄԱԿ-ի Անվտանգության խորհրդի N 1325 բանաձևի վերաբերյալ Հայաստանի ազգային գործողությունների ծրագրի մշակման, առաջխաղացման, մշտադիտարկման և գնահատման, ինչպես նաև բյուջետավորման գործողություններ և շահերի պաշտպանություն։
• Ոչ պետական և պետական դերակատարների միջև ամուր գործընկերության / կապերի/ հաղորդակցության ստեղծում՝ խաղաղության, կայունության և մարդկային անվտանգության գործընթացներում կանանց բովանդակալից մասնակցության ապահովման նպատակով։
• Գործողություններ և շահերի պաշտպանության արշավներ՝ ուղղված անվտանգության/մարդկային անվտանգության և խաղաղության գործընթացներում կանանց մասնակցության բարձրացմանը։
• ՄԱԿ-ի Անվտանգության խորհրդի N 1325 բանաձևի վերաբերյալ Հայաստանի ազգային գործողությունների ծրագրի տեղայնացումը Երևանից դուրս, մասնավորապես՝ սահմանամերձ շրջաններում։ Մեծապես խրախուսվում է այս տեսակի միջոցառումներն իրականացնել տեղական ինքնակառավարման մարմինների հետ սերտ համագործակցությամբ։
• Քաղաքացիական հասարակության կազմակերպությունների (ՔՀԿ), կանանց կազմակերպությունների և երիտասարդ կանանց ու աղջիկների շրջանում իրազեկվածության մակարդակի բարձրացում և կարողությունների զարգացում՝ գենդային բռնության դեմ պայքարելու և մարդկային անվտանգության խնդիրները լուծելու համար։
• Իրազեկման արշավներ, որոնք ուղղված են Հայաստանում «Կանայք, խաղաղություն և անվտանգություն» օրակարգի շրջանակներում  հայրիշխանական համակարգի վնասակար պատմույթների նվազեցմանը և ՄԱԿ-ի Անվտանգության խորհրդի N 1325 բանաձևի հիմնասյուների իրազեկմանն ու ավելի լավ ըմբռնմանը խթանելուն։
• «Կանայք, խաղաղություն և անվտանգություն» օրակարգի, գենդերային հավասարության և հավասար իրավունքների վերաբերյալ մեդիա նյութերի, հետազոտական նյութերի, ուսումնական ծրագրի և այլ տիպի նյութերի մշակում, որոնք կօգտագործվեն տարբեր դերակատարների շրջանում իրազեկվածության մակարդակը բարձրացնելու նպատակով։ Ստեղծված նյութերը կարող են օգտագործվել նաև շահերի պաշտպանության նպատակով։
• Գործողություններ և արշավներ՝ ուղղված տեղահանված համայնքների, կանանց ու աղջիկների կարիքների, փորձի և շահերի բացահայտմանն ու պաշտպանությանը, որոնք ուղղակիորեն տուժել են Լեռնային Ղարաբաղում տեղի ունեցած պատերազմներից։
• Տեղահանված կանանց և աղջիկների համար ոչ ֆորմալ կրթության հնարավորություններ՝ խաղաղության և մարդկային անվտանգության հարցերի վերաբերյալ  նրանց գիտելիքները խորացնելու նպատակով։

 

 

Հատուկ պահանջներ խոշոր դրամաշնորհի հայտադիմում ներկայացնողների համար

 

Խոշոր դրամաշնորհի հայտադիմում ներկայացնողները (մինչև 75․000 ֆունտ ստերլինգ (GBP)) պետք է ցույց տան, որ վերջին երեք տարվա ընթացքում հաջողությամբ իրականացրել են առնվազն 50․000 ֆունտ ստերլինգի (GBP) չափով դրամաշնորհային ծրագիր: Հայտադիմում ներկայացնողները, որոնք չեն բավարարի այս պահանջը, կմերժվեն:

Խոշոր դրամաշնորհի հայտադիմում ներկայացնողները պետք է անդրադառնան ծրագրի  կայունության իրենց ծրագրին՝ բացահայտելով ծրագրի բազմապատկիչ ազդեցությունը և դրամաշնորհային ծրագրին հաջորդող գործողությունների ֆինանսավորման աղբյուրները:

 

 

Գնահատման չափանիշներ

 

Հայտադիմումները կգնահատվեն ՊԽԼԻ-ի կողմից՝ հիմնվելով սահմանված չափանիշների վրա, որոնք նկարագրված են ստորև բերված աղյուսակում: Առնվազն 70 միավոր հավաքած հայտադիմումները և յուրաքանչյուր չափանիշի առավելագույն միավորների կեսը հավաքած հայտադիմումները (օր.՝ 30 միավորանոց չափանիշի նվազագույնը 15 միավորը) կանցնեն հաջորդ փուլ։ Այնուհետև ընտրված հայտադիմում ներկայացնողները կարող են ՊԽԼԻ-ին ներկայացնել դրամաշնորհի ամբողջական հայտերը:

 

 

Հ/հ	Չափանիշ	Առավելագույն միավորներ
1.	Դրամաշնորհային մրցույթի նպատակներին համապատասխանություն Ծրագրի նախագիծը համապատասխանում է սույն մրցույթի նպատակներին և առաջարկում է համապատասխան լուծումներ Հայաստանում առկա մարտահրավերներին: Այն առնչվում է առաջարկվող թեմատիկ ոլորտներին։	30 (փոքր դրամաշնորհներ) 25 (խոշոր դրամաշնորհներ)
2.	Տեխնիկական մոտեցում Առաջարկվող ծրագրի նախագիծը ներկայացնում է իրավիճակի հստակ վերլուծություն, վեր է հանում ծրագրի հստակ նպատակները, վերջնարդյունքները և գործողությունները: Ծրագրի նախագիծն ուղղված է տեղական կարիքներին:	30 (փոքր դրամաշնորհներ) 25 (խոշոր դրամաշնորհներ)
3.	Իրագործելիություն Ծրագիրը հաշվի է առնում իրավիճակային ռիսկերը և խելամիտ է եզրակացնել, որ առաջարկված միջամտությունը կարող է կատարվել չափավոր ռիսկերով։ Ծրագրի ժամանակացույցն իրատեսական է։	20
4.	Ծախսերի գնահատում Ծրագրի բյուջեն հստակ է և համապատասխանում է տեխնիկական մոտեցմանը։ Ներառված ծախսերը խելամիտ են և անհրաժեշտ են ծրագրի նպատակներին հասնելու համար։	20
5	Կայունություն (միայն մինչև 75․000 ֆունտ ստերլինգի (GBP) չափով խոշոր դրամաշնորհային հայտադիմում ներկայացնողների համար)   Առաջարկը/հայտադիմումը պետք հստակ բացատրի, թե ինչպես է ծրագիրն ունենալու բազմապատկիչ ազդեցություն և լինելու կայուն դրամաշնորհի ժամկետի ավարտից հետո։ Լավ ձևակերպված հայտը ցույց կտա, որ ծրագիրը ազդելու է ոչ միայն դրամաշնորհի ուղղակի շահառուների վրա (օրինակ՝ դրամաշնորհի շրջանակներում վերապատրաստված մասնակիցները կվերապատրաստեն այլ մարդկանց, աշխատաժողովի մասնակիցները կկիրառեն աշխատաժողովի ընթացքում ձեռք բերած հմտություններն ի նպաստ ազգային մակարդակի ընտրությունների բարելավմանը, ինչն էլ իր հերթին կազդի ողջ բնակչության վրա)։ Լավ ձևակերպված հայտը նաև ցույց կտա, թե ինչպես ՊԽԼԻ-ի ֆինանսավորման դադարեցումից հետո ծրագիրը կստանա դոնորների աջակցություն՝ գործողությունները շարունակելու համար։	10
Տեխնիկական առավելագույն ընդհանուր միավոր		100

 

 

Հայտադիմումների ընդունման գործընթաց

Հետաքրքրված կազմակերպությունները կարող են լրացված հայտադիմումը և բյուջեի ձևաթուղթը ուղարկել հետևյալ էլ․ հասցեին՝ [email protected]։

 

Հայտադիմումները կարող են ներկայացվել հայերենով կամ անգլերենով։ Նախընտրելի լեզուն անգլերենն է, այնուամենայնիվ, հայտադիմումի լեզուն չի ազդի դրամաշնորհի հատկացման վերաբերյալ որոշման վրա։

 

Բացի այդ, հայտադիմում ներկայացնողները պետք է լրացնեն կարողությունների գնահատման հարցաթերթիկը։ Խնդրում ենք հաշվի առնել, որ կարողությունների գնահատման հարցաթերթիկը կարող է կազմակերպչական և կարողությունների զարգացման ոլորտներում լրացուցիչ ֆինանսավորման հատկացման նախադրյալ հանդիսանալ։

 

Հարցերի դեպքում կարող եք գրել հետևյալ էլ․ հասցեին` [email protected]։

 

ՊԽԼԻ-ի աշխատակիցները կպատասխանեն Ձեր հարցերին մինչև 2022 թվականի օգոստոսի 12-ը:

 

Այս դրամաշնորհային մրցույթի մասին տեղեկատվական հանդիպումը տեղի կունենա 2022 թվականի հուլիսի 29 – ին, ժամը 11:00 – ին Zoom հարթակում։ Հետաքրքրված կազմակերպությունները հանդիպմանը մասնակցելու համար կարող են գրանցվել հետևյալ հղումով։

 

 

ՊԽԼԻ-ի մասին

 

Պատերազմի և խաղաղության լուսաբանման ինստիտուտը (iwpr.net) շահույթ չհետապնդող միջազգային կազմակերպություն է, որի գլխավոր գրասենյակները գտնվում են Լոնդոնում և Վաշինգտոնում։ ՊԽԼԻ-ն խաղաղություն և ժողովրդավարություն է ստեղծում ազատ և անաչառ լրատվամիջոցների օգնությամբ։ Այն ուժեղացնում է տեղական լրատվամիջոցները հակամարտությունների և փոփոխությունների առաջնագծում՝ աշխատելով աշխարհի 3 տասնյակ երկրներում և տարածաշրջաններում։ Այն ներառում է՝ անկախ տեղական լրատվամիջոցների ստեղծում, տեղական լրագրողների, խմբագիրների և պրոդյուսերների պատրաստում, մարդու իրավունքների, արդյունավետ կառավարման և հարակից հարցերի վերաբերյալ լայնածավալ խորը հաշվետվությունների և զեկույցների աջակցություն, զարգացող երկրներում և միջազգային մակարդակով մասնագիտական հաշվետվությունների և զեկույցների տարածում, ինչպես նաև տվյալ տարածաշրջանում մարդու իրավունքների, միջազգային արդարադատության և կանանց կազմակերպությունների հաղորդակցման կարողությունների ամրապնդում:

 

Բյուջեի և հայտի օրինակելի ձևերը ներբեռնելու համար սեղմեք համապատասխան հղումների վրա։

 

BREN-ի մասին

 

Ուժեղացնելով արևելյան հարևանության կայունությունը (BREN) ծրագիրն իրագործվում է Միացյալ Թագավորության Կոնֆլիկտների, կայունության և անվտանգության հիմնադրամի աջակցությամբ և իրականացվում է Պատերազմի և խաղաղության լուսաբանման ինստիտուտի (ՊԽԼԻ) կողմից՝ Կին խաղաղաշենների համաշխարհային ցանցի (GNWP) հետ համագործակցությամբ։

 

BREN ծրագիրն օգնում է քաղաքացիական հասարակության կազմակերպություններին (ՔՀԿ) խաղաղության և անվտանգության ոլորտում տրանսֆորմացիոն փոփոխություններ իրականացնել Հայասատանում, Ադրբեջանում, Վրաստանում և Մոլդովայում՝ կանանց, ինչպես նաև մարգինալացված, խոցելի ու սոցիալապես մեկուսացված խմբերի շրջանում մարդկային անվտանգությունը բարելավելու նպատակով։