«Տարածիր ԱՐՎԵՍՏ» արշավի մեկնարկը
Ս․թ․ հոկտեմբերի 31-ին, ժամը 19:00-ին սիրով հրավիրում ենք ձեզ միասին տոնելու «Տարածիր ԱՐՎԵՍՏ» ամենակրթամշակութային արշավի մեկնարկը։
Էյվա արվեստների հիմնադրամը «Դասավանդի’ր, Հայաստան» կրթական հիմնադրամի հետ համատեղ հանդես է գալիս մի նոր համահայկական նախաձեռնությամբ՝ ազդարարելով «Տարածիր ԱՐՎԵՍՏ» կրթա-մշակութային արշավի մեկնարկը։ Նպատակն է Հայաստանի և Արցախի խոցելի համայնքների դպրոցականների շրջանում խթանել արվեստի կրթությունը, նպաստել հայկական արվեստի ճանաչմանն ու տարածմանը: Խաղային անմիջական և ազատ ինքնարտահայտմանը նպաստող միջավայրում երեխաները կբացահայտեն հայ նկարիչների յուրօրինակ աշխարհը, կճանաչեն հայկական լեռնաշխարհը, պատմությունը, բնությունը, հայի կերպարը արվեստագետների աչքերով։
Նախատեսվում է նվիրաբերել ավելի քան 500 ԱՐՎԵՍՏ խաղ-գրքեր Հայաստանի 6 մարզերի և Արցախի 85 դպրոցներին («Դասավանդի’ր, Հայաստան» շահառուներ)՝ թիրախավորելով շուրջ 11,000 և ավելի երեխայի։ Միջոցառման ընթացքում տեղի կունենա նաև ԱՐՎԵՍՏ խաղ-գրքի անգլերեն և արևմտահայերեն տարբերակների շնորհանդեսը՝ տարածելով հայկական արվեստը նաև աշխարհասփյուռ հայ համայքներում և կրթօջախներում, ինչպես նաև համաշխարհային հանրության շրջանում։
Մեկ տարի առաջ Էյվա արվեստների հիմնադրամը նախաձեռնեց արվեստը խթանող խաղայնացված կրթական նյութերի մշակում և հանրայնացում՝ հաշվի առնելով այն մեծ բացը, որն առկա է այսօր․ այն է՝ արվեստի վերաբերյալ երեխայակենտրոն, մատչելի ուսումնաօժանդակ նյութերի հասանելիություն։
ԱՐՎԵՍՏ խաղ-գիրքն իր տեսակի մեջ առաջինն էր, որն առավել մատչելի, պատկերավոր և երեխաների համար գրավիչ ձևաչափով ներկայացրեց 19-20-րդ դդ․ հայ 12 մեծանուն նկարիչներին` Հակոբ Հովնաթանյանից մինչև Մինաս Ավետիսյան, և նրանց հայտնի գործերը։ Խաղ-գիրքը դարձավ յուրահատուկ ձեռնարկ` երեխաների մոտ ձևավորելու արվեստը, առավելապես հայկական արվեստը գնահատելու կարողություն, ինչպես նաև խթանելու ճաշակը, ստեղծարար միքտը, ընդլայնելու մտահորիզոնը։
Արշավը «Հայ արվեստի կրթություն» ծրագրի մասն է, որն իրականացվում է Հայկական Բարեգործական Ընդհանուր Միության և Եվրասիա համագործակցություն հիմնադրամի «ՔՀ Կամուրջ» ծրագրի շրջանակներում՝ Եվրոպական միության ֆինանսավորմամբ:
Ձեր մասնակցությունը մեզ համար կարևոր է։ Խնդրում ենք նախապես գրանցվել՝ տեղերի սահմանափակ լինելու պատճառով: