Հարգելի՛ ՔՀԿ ներկայացուցիչներ,

Հաշվի առնելով արդի աշխարհում տեղեկատվական հոսքերի ուժգնությունը, ինչպես նաև հետազոտության կարևորությունը՝ Հետազոտական ռեսուրսների կովկասյան կենտրոն (ՀՌԿԿ)–Հայաստան հիմնադրամը, ՀԿ Դեպո ծրագրի շրջանակներում, նախաձեռնեց այս առցանց ձեռնարկի ստեղծումը: Մեր դիտարկումները ցույց են տալիս, որ վերջին տարիներին Հայաստանում գործառնող քաղաքացիական հասարակական կազմակերպությունները (ՔՀԿ) հետազոտություններ իրականացնելու կարիք են զգում: Հետազոտության և հետազոտական հմտությունների կարիք է առաջանում նաև սոցիալական իրականության միջամտության/բարեփոխման ծրագրեր մշակելիս: Այս առցանց ձեռնարկը հասցեագրված է հետազոտական կարիքներ ունեցող հայաստանյան ՔՀԿ ներկայացուցիչներին, որոնք մտադիր են զարգացնել իրենց հետազոտական կարողությունները: Այս առցանց ձեռնարկը, որ պարունակում է բազմաթիվ էլեկտրոնային հղումներ, ժամանակի ընթացքում կզարգացվի` հիմնվելով ՔՀԿ ներկայացուցիչների արձագանքի ու խորհուրդների վրա: Ուստի, ակնկալում ենք, որ այս ձեռնարկի հրատարակմամբ կմեկնարկի այն կիրառելու արդյունավետ գործընթաց ու երկխոսություն: Ձեր կողմից ձեռնարկն օգտագործելու ու Ձեր արձագանքի շնորհիվ այն կարող է անընդհատ կատարելագործվել՝ Ձեզ դարձնելով ձեռնարկի համահեղինակներ: Մենք ակնկալում ենք, որ այս ձեռնարկի առցանց հրատարակմամբ Ձեզ ենք փոխանցում ոչ թե վերջնական ուղեցույց, այլ անընդհատ զարգանալու միտում ունեցող ու «ապրող» հարթակ՝ այնպիսին, ինչպիսին ինքը սոցիալական հետազոտությունն է: Հայաստանյան ՔՀԿ-ների շրջանում նոր ու որակյալ հետազոտական աշխատանքների ակնկալիքով ու շնորհակալությամբ՝

ՀՌԿԿ-Հայաստան