"Key to Open Data" educational program for CSOs (Armenian)

 «Լրագրողներ հանուն ապագայի» ՀԿ-ն «Ամփոփ Մեդիա» նախաձեռնության հետ համատեղ հայտարարում է մրցույթ հասարակական կազմակերպությունների ներկայացուցիչների շրջանում «Բաց տվյալների բանալի» 6-ամսյա կրթական ծրագրին մասնակցելու համար:

 

Ո՞րն է նպատակը

Ծրագրի նպատակն է ՀԿ ներկայացուցիչներին ապահովել բաց տվյալներից օգտվելու այնպիսի կարողություններով, որոնք կիրառական կլինեն ՀԿ-ների ամենօրյա գործունեության ընթացքում և կնպաստեն տվյալների հետ աշխատանքում գրագիտության մակարդակի բարձրացմանը, ՀԿ-ների ուժեղացմանը և արդյունավետ աշխատանքին:

 

Որքա՞ն է ծրագրի տևողությունը

 

Ծրագրի ընդհանուր տևողությունը 6 ամիս է: Այն բաղկացած է երկու կարճաժամկետ դասընթացներից. առաջինը՝ ծրագրի նախնական փուլում, երկրորդը` վերջնական:

 

Միջանկյալ փուլում մասնակիցների հետ աշխատանքը կկազմակերպվի վեբինարների միջոցով:

 

Ծրագրի բոլոր փուլերում մասնակիցները կստանան տեսական և գործնական գիտելիքներ, անհրաժեշտ գրականություն, ինչպես նաև կտրվեն գործնական հանձնարարություններ և խորհրդատվություն:

 

Ծրագրի ընթացքում մասնակիցները կաշխատեն սեփական նախագծերի վրա, որոնք կհրապարակվեն մասնակից ՀԿ-ների կայքերում և այլ մեդիա հարթակներում:

 

Հիմնական թեմաներն ու գործնական աշխատանքները

-  Բաց տվյալներից օգտվելու կարևորությունը

-  Տեղական և միջազգային բաց տվյալների բազաներ

-  Բաց տվյալների բազաներից տվյալների դուրս բերում, մշակում և վերլուծում

-  Տվյալների վիզուալիզացիա և մուլտիմեդիա գործիքներ

-  Զեկույցների ամփոփ պատրաստում և հանրայնացում

 

 

Ի՞նչ կստանան մասնակիցները

 

-  Առցանց միջավայրում տվյալների արագ և մատչելի որոնման և տարածման ունակություն

-  Բաց տվյալներից օգտվելու և տվյալների հիման վրա ինֆոգրաֆիկաներ պատրաստելու կարողություն

-  Առցանց տեղեկատվական միջավայրում մասնագիտական կարողությունները լիարժեք դրսևորելու հմտություններ

-  Անհրաժեշտ գրականություն, տվյալների բազաներ և առցանց գործիքներ

-  Մասնակցության վկայական

 

Ո՞վ կարող է դիմել

Դիմել կարող են Հայաստանում գրանցված ՀԿ ներկայացուցիչները: Խրախուսվում է հատկապես մարզային ՀԿ ներկայացուցիչների մասնակցությունը:

Ուսումնական ծրագրի արդյունավետ յուրացման համար անհրաժեշտ է, որպեսզի դիմորդը ունենա.

-  Համակարգչային ծրագրերից (Word, Excel, Power Point, լուսանկարներ խմբագրող ծրագրեր) օգտվելու կարողություն

-  Առցանց/սոցիալական/բլոգային հարթակներից օգտվելու կարողություն (Google Drive, Facebook)

-  Հանրահաշվի հիմունքային գիտելիքներ, վերլուծական միտք

-  Օտար լեզուների իմացություն՝ ցանկալի է անգլերեն և/կամ ռուսերեն

 

Պարտադիր է

-  Լիարժեք մասնակցությունը ծրագրի օֆլայն և օնլայն բոլոր միջոցառումներին

-  Պատրաստակամությունը` կատարելու ծրագրի շրջանակներում տրված բոլոր հանձնարարությունները

 

Դիմելու համար անհրաժեշտ փաստաթղթերը

1.      Ինքնակենսագրական (CV` հայերեն, առավելագույնը՝ 2 էջ

2.      Հետաքրքրության հայտ (առնվազն 200 բառ) - նկարագրել փորձը (ներառյալ տվյալների հետ աշխատանքի փորձը, եթե առկա է) և նշել, թե ինչու եք ցանկանում մասնակցել այս ծրագրին

3.      Երաշխավորագիր - հասարակական կազմակերպության ղեկավարի (գործատուի) դիմում-նամակը, որը կերաշխավորի Ձեր թեկնածությունը

4.      Թեմայի առաջարկ-հիմնավորում (առնվազն 300 բառ): Նախագծի թեմայի առաջարկ-հիմնավորում (synopsis), որի շուրջ ծրագրի ընթացքում կաշխատի մասնակիցը: Առաջարկը պետք է պարունակի հետևյալ հարցերի պատասխանները.

-   Ո՞րն է խնդրի/թեմայի կարևորությունը,

-   Ո՞րն է խնդրի հիմնական պատճառը,

-  Ի՞նչ վիճակագրական տվյալներ են առկա խնդրի արդիականությունը հիմնավորելու/փաստելու համար,

-   Ի՞նչ առցանց աղբյուրներ կան խնդրի մասին հավելյալ տեղեկություն ստանալու համար:

 

Ինչպե՞ս դիմել

 

Մրցույթին մասնակցելու համար անհրաժեշտ է վերը նշված փաստաթղթերն ուղարկել [email protected] էլփոստին մինչև 2018թ. մարտի 11-ը, ժամը 24:00՝ նամակի անվանում (Subject) տողում նշելով «Բաց բանալի»: Բոլոր փաստաթղթերը պետք է լինեն PDF ձևաչափով ընդհանուր առմամբ ոչ ավել, քան 2 ՄԲ: 

 

Ուշադրություն. միայն ընտրված թեկնածուները կհրավիրվեն հարցազրույցի: Մարզերից ընտրված թեկնածուների հետ հարցազրույցը կանցկացվի Skype-ի միջոցով:

 

Լրացուցիչ տեղեկությունների համար գրեք [email protected] էլփոստին կամ զանգահարեք 010 20-45-67 համարով (աշխ. օրերին, ժամը 15:00-17:00)

 

Կազմակերպիչների մասին

 

«Լրագրողներ հանուն ապագայի»  հասարակական կազմակերպությունն իր հիմնադրման պահից (2007թ.) ակտիվ գործունեություն է ծավալում հայաստանյան լրագրության, մեդիադաշտի, տեղեկատվական տեխնոլոգիաների անվտանգության և այլընտրանքային մեդիա կրթության ոլորտներում: Այս տարիների ընթացքում կազմակերպությանը հաջողվել է ստեղծել ԶԼՄ և ՏՏ ոլոտները ներկայացնող փորձագետների ցանց, որի շնորհիվ կազմակերպությունն իրականացնում է դասընթացներ, հետազոտական գործունեություն, հրատարակում մասնագիտական գրքեր, համացանցում ստեղծում փորձարարական տեղեկատվական հարթակներ և հանդես է գալիս զանազան հասարակական նախաձեռնություններով: Մինչ այժմ կազմակերպության իրականացրած միջոցառումներին մասնակցել են մոտ 3000 ԶԼՄ և ՀԿ ներկայացուցիչներ, ուսանողներ, դիտորդական և թիրախային խմբեր: Կազմակերպության ֆեյսբուքյան էջն է`https://web.facebook.com/jnewsarmenia/

 

«Ամփոփ Մեդիա» նախաձեռնության հիմքում Ampop.am տվյալների լրագրության հարթակն է, որը բացատրական լրագրության ժանրում ամփոփ ներկայացնում է Հայաստանում և աշխարհում ակտուալ և քննարկվող թեմաները: «Ամփոփի» խմբագրակազմը մասնագիտացած է նյութերը վիզուալիզացիայի, ինֆոգրաֆիկաների եւ մուլտիմեդիա գործիքների համադրությամբ մատուցման գործում: 2017թ-ին՝ մեկամյա գործունեության արդյունքում, Ampop.am կայքն արժանացել է 4 առաջատար մեդիա մրցանակների: Նախաձեռնությանը հետևեք այստեղ` https://web.facebook.com/ampop.am/

 

Սույն ծրագրի իրականացումը հնարավոր է դարձել Ամերիկայի ժողովրդի աջակցությամբ` ԱՄՆ Միջազգային զարգացման գործակալության միջոցով, «ՀԿ Դեպո - Հասարակական կազմակերպությունների զարգացման ծրագրի» շրջանակում: Ծրագրի շրջանակներում ստեղծված նյութերի բովանդակությունը կամ արտահայտված տեսակետները միմիայն «Լրագրողներ հանուն ապագայի» ՀԿ-ը և Եվրասիա համագործակցություն հիմնադրամինն են և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները: